علمي إبنك يدافع عن نفسه

13

Get real time updates directly on you device, subscribe now.

مقالة مهمة جدا للدكتورة (هدي الرافعي )

وتوضح فيها ازاي تخللي طفلك يدافع عن نفسه اقريها حتستفادي منها جدا

بعض الأطفال لما بيتعرضوا لإساءة من أطفال آخرين زي الضرب أو السباب أو السخرية أو إن حد ياخد حاجتهم أو دورهم، مبيعرفوش يدافعوا عن نفسهم. وده طبعًا بيتعب نفسيتهم، وبيعرضهم لمزيد من الاعتداءات لإنهم بيتشافوا من الأطفال الآخرين ضعفاء. إزاي تعلمي طفلك يدافع عن نفسه؟

الموضوع مبيتمش بين يوم وليلة، ولا هو عبارة عن شوية مهارات بيتعلمها وكفى، ولا هي توجيهات منك إزاي يتصرف في الموقف العلاني ويقول إيه في الموقف الفلاني. هو فعلًا فيه مهارات الطفل بيحتاج يتعلمها، لكن الأهم علاقة الطفل بيكي وبأبوه. العلاقة دي لو اتبنت صح بتكون هي الأساس لإحساسه بالأمان والثقة والقوة اللي هيخليه يقدر يدافع عن نفسه. طيب إيه هي شكل العلاقة، وإيه هي المهارات اللي تنتج طفل قوي يقدر يدافع عن نفسه؟

1- اسمحي لطفلك يقول “لأ”: اقبلي إن طفلك يعارضك، واسمحي له يمشي كلامه أحيانًا، ولو حاجة لابد منها فسايسيه واصبري لحد ما يعملها، وتجنبي تمامًا الإهانة اللفظية والبدنية.

2- علمي طفلك يعبر عن مشاعره: لما يعيط متطلبيش منه يبطل عياط، ومتقوليش جمل زي “الأطفال الحلوين مش بيعيطوا”، سيبي له مساحة يعيط. وقفيه عند حده بحزم واحترام لو بدأ يؤذي نفسه، أو يؤذي غيره أو يغلط فيه، لإنه هيتعلم منك يعمل ده مع غيره لو حد غلط فيه. ساعديه يسمي مشاعره، حطي نفسك مكانه عشان تقدري تعرفي هو ممكن يبقى حاسس بإيه. احترمي مشاعره حتى لو مش موافقة على اللي بيقوله أو مش هتنفذي له طلبه.

3- علمي طفلك التعبير عن نفسه بطريقة محترمة وحازمة: علميه جمل زي “ده دوري من فضلك، مش مسموح لك تضربني، لو سمحت شيل إيدك من عليّ إلخ”

4- كوني منصفة: بعض الآباء والأمهات لما بيحصل خلاف بين طفلهم وطفل تاني بياخدوا صف ابنهم حتى لو غلطان، وبعضهم بياخد صف الطفل التاني وبييجي على ابنه ويطلعه غلطان خوفًا إنه يظهر بمظهر المتحيز لابنه. والاتنين مش صح وبيطلعوا طفل ضعيف ومنهزم أو مفتري وأناني. خليكي منصفة ومتعمليش حساب لكلام الناس، لو ابنك مظلوم اقفي في صفه، ولو أخطأ عرفيه خطأه من غير إهانة واطلبي منه الاعتذار وإصلاح خطأه. كده الطفل يتعلم الإنصاف هو كمان، وميقبلش الظلم على نفسه أو على غيره.

5- تجنبي استخدام العقاب والقوة البدنية في التربية: لو الطفل اتعود على الاحترام، هيقدر يميز التعدي عليه في حياته بعد كده وهيرفضه بطريقته. وأسلم طريقة عشان طفلك ميتعرضش للاعتداء وميعتديش على غيره هو إنه يكبر في علاقات فيها حب واحترام. استخدام القوة أو العقاب للتحكم في الطفل بيعلمه استخدام القوة ضد الآخرين أو السماح للآخرين بممارسة القوة ضده.

6- علمي طفلك بعض المهارات الاجتماعية: عن طريق الألعاب ولعب الأدوار في البيت زي إزاي يتعرف على أطفال تانيين وينضم للعب معاهم، لإن أحيانًا الطفل ممكن يرضى بالإساءة في سبيل إنه ينال قبول أقرانه، فمهم إنك توفري له الفرص لإقامة علاقات صحية.

7- علمي طفلك إزاي يرد بهدوء لما حد يسخر منه أو يشتمه: المتنمر بيبقى عاوز يحس بالقوة، واستجابة الطفل برد فعل مشحون بالعواطف بيحقق له اللي هو عاوزه. لذلك مهم يرد بحزم وهدوء في نفس الوقت زي “ميهمنيش كلامك، أنا عندي حاجات تانية أعملها، إلخ” ويمشي ويسيبه.

8- علمي طفلك إنه مش عيب يخاف ويطلب المساعدة من حد كبير، وإنه بكدة ميعتبرش فتان ولا حاجة، وإن المعتدي بيكون عاوز يوهمه بكده عشان يفضل معزول وضعيف.

9- علمي طفلك لو لقى طفل تاني بيتعرض لتنمر، يدعمه بإنه يروح يقف جنبه وياخده بعيد، أو يروح يقول لحد كبير، وميقفش يتفرج لإن المتنمر بيحب الجمهور.

10- تدخلي عند اللزوم: عشان الطفل ميحسش إنه مسئول عن التعامل مع الموقف كله لوحده، خاصة لو حسيتي إن الموضوع أكبر من مهاراته أو إن الأذى كبير، أو إن الموضوع بيكبر.

11- علمي طفلك يتصرف بسرعة أو يبلغك بسرعة أول ما يتعرض لتنمر حتى لو بسيط لإن غالبا البداية بتكون بسيطة كنوع من جس النبض، ولو الطفل سكت المعتدي بيسوق فيها.

12- صدقي طفلك وتجنبي اللوم والعقاب، وخدي موقف إيجابي عشان طفلك يثق فيكي ويطلب مساعدتك.

13- وأي حاجة عاوزة تعلميها لطفلك محتاجة تتعلمي إنتي كمان تعمليها عشان هو بيتعلم من تصرفاتك أكتر ما بيتعلم من توجيهاتك لو إنتي مبتعمليش بيها.

الطفل القوي بيبدأ وضع أساسه من الصغر، وبيبدأ وضع أساسه من البيت. ومحتاجين نعرف إن القوة اللي بنغرسها في ولادنا هنكون احنا أول ناس يستخدموها معانا، فيا ترى هنقبل ولا هنرجع في كلامنا؟!

Get real time updates directly on you device, subscribe now.

تعليق 1
  1. […] تابع قراءة الموضوع بالكامل من الرابط التالي : علمي إبنك يدافع عن نفسه […]

التعليقات متوقفه