الحماية الزايدة بالأطفال !!!!

10

Get real time updates directly on you device, subscribe now.

.
بتعاني من خوفك المبالغ فيه علي اولادك!!
حياتك و حياتهم متأثره و شاعر بعدم ارتياح رهيب بسبب قلقك المستمر عليهم!؟؟
البوست دا عشانك
.
بسم الله نبدأ
.
فرح، طفلة اتولدت بدري في الشهر الثامن اهلها كانوا بيخافوا عليها من الهوا الطاير خصوصا انها جت بعد سنين انتظار طويله و علاجات و عمليات و ليالي دعاء و توسل لربنا انه يرزقهم باطفال
.
فرح اول فرحتهم و بعد طول انتظار مفكروش غير في انهم لازم يدلعوها و يحافظوا عليها من الهوا الطاير
خصوصا انها اتولدت بمرض في القلب و دا زود قلقهم عليها
كانوا بيخافوا حد يلمسها بمعني الكلمه
ممنوع حد يشيلها
الاكل و النوم و الصحيان بمواعيد بالدقيقه
لما تعيط و لا تقع البيت كله يجري عليها
و لما تمرض امها بتدخل في دور اكتئاب و وساوس و قلق مرضي
و ابوها بيفقد تركيزه لا بيعرف يشتغل و لا ينام و لا يفكر و لا يعيش طول ما فرح تعبانه
فرح كبرت شوية  و خوفهم عليها كبر معاها فرح كانت بتحبهم جداااا كانت عايشه في حب و تدليل و دلع
كانت مع اي مشكله تلاقيهم في ضهرها سند و حماية ليها عمرها ما خافت تواجه مشكله لانها اصلا ماجربتش
دايما اهلها كان عاملين غلاف جوي حواليها عشان يحميها
و بطبيعة الحال مع تقدم عمرها بدأت تتحط في مواقف و ظروف من غير اهلها و تحتك ببشر بمختلف الطبائع
من مدرسة لكليه
لاقيت نفسها معندهاش القدرة تواجه اي ازمة و بتنهار من اقل صدمة .جواها شعور بالخوف و الجبن مسيطر عليها زي المكشوف من غير غطا .سهل ان حد يأذيها ماتقدرش تدافع عن نفسها خصوصا بعد ما تعرضت لصدمة وفاة والدها بعد صراعة مع المرض لسنوات
فرح كانت زمان متغلفة بقشرة الثقه بالنفس لان كان وراها الي بيصدرلها في اي ازمة لكن تحت القشرة دي كان فيه ثقة في الذات و القدرات متعمدة لابعد مدي… غير قادر علي تحمل المسؤلية و اللي تطلبه لازم يتحقق اياً كانت الظروف
.
فرح في منهج التربية الإيجابية بتتصنف تحت مسمي overprotected child#
الطفل اللي بنفضل قافلين عليه من كتر خوفنا بيطلع ضعيف احنا بنأذيهم من غير ما نحس…حتي لو خوفك
مرضي غصب عنك. …ربنا خلق الداء و الدواء. فيه متخصصين و اهل علم شغلتهم ازاي يرجعوك انسان سوي طبيعي
انك مستسلم للخوف المرضي دا انانية منك
جاهد نفسك و اتعالج و الجأ لمتخصص لأنك ببساطه ممكن تأذي اقرب الناس ليك و تتسبب في ضعف شخصيتهم و عدم مقدرتهم علي مواجهة الحياة من غيرك
انت مش هاتعيشلهم طول عمرك
فكر في حياة ولادك من بعدك
.
فكر في حياتهم وقت ضعفك او كبر سنك او مرضك

آسفه ان البوست ممكن يوجع ناس منكم
بس وجع بوست يفوقكم و لا وجع صدمة ابنك او بنتك يتحطوا فيها من غيرك بسبب عدم قدرتهم علي مواجهة الحياة
و عدم قدرتهم علي تحمل المسؤوليه
.
جاهد نفسك و امسكها شوية فكر بالمنطق.. اللي انت خايف عليه منه دا يستحق الخوف و لا لا!؟؟
عليه اجماع من المحيطين بالطفل انه فعلا موقف محتاج فيه تصدر وحمايه!؟؟
.
فيه خطر علي حياته؟
هايسيب اثر سلبي عليه عل مدي البعيد اذا ابنك او بنتك واجهوا الموقف دا لوحدهم!؟
ايه المهارات الحياتية و القيم و الخبرات اللي هايتعلموها نتيجة الحماية الزايده؟
.
لما ولادك يتحطوا في ازمه شجعهم يشغلوا مخهم و يفكروا في الحل و يواجهوها…بلاش تتصدر للمساعده الا اذا هما فعلا محتاجنها و الموقف يستحق
.
انت يا كبير لما كنت لسه طفل صغير بتتعلم المشي وقعت و اتخبطت و اتعورت كمان و مسكت الترابيزه بنفسك و قعدت تعافر عشان تتعلم المشي!!!! عارف كل الخبطات و الوقعات و الاصرار دا كان ليه؟؟ عشان ربنا من رحمته بينا خلاها وسيله لتقوية عضلاتنا عشان نقدر نقف علي رجلنا و لو فضلنا من غير مانحاول بنفسنا و لا نقع و لا نتخبط هانقعد علي كرسي متحرك باقي حياتنا…
.
فيه قصة مشهوره لفراشه داخل شرنقه راجل شافها بتعافر عشان تطلع منها قام مساعدها و فاتح الشرنقه و مطلعها عشان تطير…عارفين ايه اللي حصلها؟؟؟ ماتت !!
.
لان التجربه و المجاهده و المحاولات الذاتية دي ربنا خلقها فيها بالفطره لتقوية عضلات اجنحتها عشان تقوي علي الطيران…
.
ليه بقا عايز تلف ابنك او بنتك جوا الشرنقه طول حياته!؟؟؟ هايتعب…
لو خايف عليه بجد سيبه يواجه الحياه و يتحمل المسؤليه
خوفك الزايد و حمايتك المبالغ فيها أذي ليه عل مدي البعيد
خير الامور الوسط لا نسيبهم تماما بدون مراقبه و حمايه و لا نفضل نواجهه الحياه بدلهم
.
مش مبرر ابدااااا
انه طفل وحيد او جه بعد سنوات طويله او بتحبه بزياده او مريض او انك متعقد من اي موقف حصلك قبل كدا في حياتك او انك نفسيا محتاج متخصص لعلاج الخوف و القلق الزايد..كل دا مش مبرر و لا حقك عشان تقفل علي ابنك و تأثر علي تكوين شخصيته باقية حياته!!

Get real time updates directly on you device, subscribe now.

التعليقات متوقفه