إسعافات مهمة في عدم وجود دكتور

5

Get real time updates directly on you device, subscribe now.

– في حالة الحرق :

مياه ساقعة فورا على المكان المحروق .. و بعديها فوطة مبلولة بماية ساقعة ..

و نغير عليها كل ما تسخن .. لحد امتى ؟! لحد ما الوجع يبتدي يخف .. بعديها مرهم مضاد حيوي و مسكن ..

الحرق لو في الوش او كف اليد او الاعضاء التناسلية يبقى لازم نطلع على الطواريء فورا !

مفيش معجون سنان بتاتا .. مفيش اي نوع من انواع الكريمات الاخرى لحد ما نخلص اسعافاتنا الاولية ..

– في حالة الجروح :

* لو بينزف .. يبقى هنضغط عليه لحد ما النزيف يقف .. و بعديها نشوف لو مفتوح نطلع على الطواريء لانه ممكن يكون محتاج خياطة ..
* مفيش نزيف يبقى نغسله بماية و صابون ((الافضل محلول ملحي من الصيدليه لو متوفر)) .. بعديها بيتادين مطهر و مرهم مضاد حيوي و نغطيه بغيار معقم

– في حالات الاسهال:

هنعوض بسوائل .. هنبتدي اكل النزلة المعوية .. الاسهال لو ميه وىبيغرق الهدوم من تحت البامبرز و زاد عن ٦ مرات يوميا هنبتدي محلول الجفاف معلقة لكل كيلو وزن بعد كل مرة اسهال
حقنة للقيء لو بيرجع ..

ابتدى يدروخ منك او ابتدى يرجع ترجيع مش بيقف او يبقى ملهوف على المية .. نطلع على المستشفى

عايز اقولكم .. كل ادوية الاسهال و مطهرات المعدة في معظم الاحوال .. بلح و بتضر اكتر ما بتنفع !! السوائل و الأكل هما سر النجاح !!

نفتكر ((القاعدة الذهبية في النزلة المعوية)) : مفيش ترجيع .. يبقى مفيش قلق !

– في حالة التشنجات :

هنحط الطفل على جنبه الشمال ..
لو سخن ساعتها يبقى ننزل الحرارة فورا .. كمادات على طول
لو عرفنا : نفتح الفم بايدنا و نحط فيه طرف فوطة يعض عليها ..
و بعديها نطلع على الطواريء

– في حالة السخونية ..

كمادات ثم كمادات ثم كمادات .. و خافض للحراره .. الأكثر أمانا : الباراسيتامول (زي البيرال – تيمبرا – ابيمول – بارامول – بانادول) و ده اللي هنبتدي بيه .. الأكثر فاعليه: الديكلوفيناك (زي الفولتارين – الدولفين – اولفين) و ممنوع قبل ال ٦ شهور

– النزيف من الأنف :

نقعد الطفل .. نضغط بايدينا على فتحتي الانف من بعد المنطقة العظمية على طول ((مش من تحت)) .. نميل الطفل لقدام و نفضل ضاغتين من ٥ ل ١٥ دقيقة .. النزيف موقفش … شاشة نكسر عليها امبول (سيكلوكابرون) لحد ما نروح المستشفى ..

مترجعوش ابدا راس الطفل اللي بينزف ورا .. ده خطأ شائع للاسف بيخلي كتير من الاطفال يبلعوا الدم او يشرقوا فيه !!

– الاجسام الغريبة و اصابات العين :

نغسل العين بماء جاري او محلول ملحي .. لو الاصابة شديدة .. قطرة كورتيزون للعين و نغطي العين المصابة بغيار معقم مبلول لخد ما نوصل المستشفى

– عضة الكلب :

غسيل المكان فورا بماء جاري و صابون .. رفع المكان المصاب لاعلى .. تطهيره بكحول ٧٠٪‏ لو مفيش نزيف منه .. مرهم مضاد حيوي موضعي .. تغطية بغيار معقم لحد ما نروح المستشفى .

– اشتباه في كسر:

اياكم و محاولة تحريكه !! نثبت المكان المشتبه بيه كويس .. ممكن نستخدم مسطره و شاش .. لو في الايد نعلقها جنب جسمه عشان متتحركش لحد ما نوصل المستشفى

– حالات الشرق و الاختناق :

لازم نعرف الأول ان الشرقان عند الرضع وقت الرضاعة في اغلب الاحوال بتكون حاجة عادية جدا و متكرره .. كل اللي هنعمله ان احنا هنميل الطفل على جنبه .. نخبط بالراحة على ضهره .. نمسح الفم و الانف بفوطة نضيفة ..

طيب الكبار اللي بيشرقوا في لعبه او مكسرات او لبيسة قلم مثلا :

طول ما الطفل بيكح .. هنسيبه يكح بنفسه و نشجعه على الكحة ..
ابتدى يدروح او يحصل زرقان ..

* لو اقل من ٣ سنين : ايدينا الشمال على فم معدته .. اليمين نخبط نخبط بيها على ضهره ٥ مرات ورا بعض .. و بعديها نقلبه و نخبط على فم معدته بقبضة ايدينا ٥ مرات و نستنى باخد نفس .. نكرر الموضوع بعديها ((الخمسة و الخمسة))

* لو اكبر من كده : نحضنه من وراه و نشبك ايدينا من قدام عند فم معدته .. نعصره ٥ مرات ورا بعض و نستنى ياخد نفسه .. و نكرر الموضوع بعديها

– لو الطفل اتكهرب :

قبل ما نقرب منه .. نفصل مصدر التيار الكهربائي فورا .. جريك على الطفل و هو بيتكهرب مش هينقذه .. كل اللي هتعمله انك هتتكهرب معاه .. لو الطفل فاقد الوعي و مش بيتنفس هنبدأ الانعاش القلبي فورا ((هنتكلم عنه في بوست لوحده بالشرح الوافي و التفصيل)) ..

و اخيرا … لازم نبقى عارفين .. الوقاية خير من العلاج .. دايما موفرين بيئة آمنه ليهم و عينينا عليهم على طول

 

Get real time updates directly on you device, subscribe now.

تعليق 1
  1. […] تابع قراءة الموضوع بالكامل من الرابط التالي : إسعافات مهمة في عدم وجود دكتور […]

التعليقات متوقفه