اتعلمي ازاي تفرحي اللي بتحبيه

عمرك قلت الجمله دي جواك ؟ “نفسي اعمل حاجه و تسعد اللي حوالي”. الهديه رسالة حب و اهتمام و بالتاكيد تسعد اللي يحبك. خلي بالك ..مش مجرد هديه هي اللي هتقوم بالدور كله في اسعاد محبينك يا كبير.. خليك ذكي و افهم اي نوع من الهدايا بيحبه كل محبوب في حياتك.
اكيد هتقولي و اعرف ازاي ؟ هاعلمك في خطوات بسيطه :
1- راقب الشخص المحبوب. راقب نظراته و اسمع بحرص لما بيقول جملة خطيره فيها مفتاح سعادته – و سعادتك لو اهتميت به .الجمله دي بتقول : “بحب كذا”.
2- لما تعرف تفاصيل الشيء اللي بيحبه نفذه بالحرف و بلاش فذلكه . ماتقولش لا هاجيب له كذا احسن من اللي هو بيحبه.
3- نفذ فورا بدون مناسبه. لان المناسبه اللي ليها معنى هي احساسك الحالي برغبتك في اسعاده . و دي اقوى رسالة حب . انه يلاقيك جايب له هديه بدون مناسبه و مقدمها بحب و اهتمام و لما يسالك السؤال المصري الرخم بتاع ” ايه المناسبه يعني ؟ تكون انت بقى محترف وتكسبه بجون من بتوع ابوتريكه كده و تقول له يا لعيب :” اول ما شفتها عرفت انها هتعجبك و انبساطك هو اهم مناسبه بالنسبه لي “..
4- ركز بقى معايا في التانيه : انتظارك لمناسبة ما رساله تانيه خالص. انتظارك لمناسبة عيد ميلاده مثلا لطيف قوي و بيقوله ” انا باهتم بكل حاجه تخصك “..حلوه دي برده ما تفوتهاش . اوعى تعمل زي واحده خطيبها زارها في العيد من غير هديه فبتقوله – بثقه و عشم – ايه ده فين عيديتي ؟ قام رد عليها بمصريته الساخره شديدة القسوه ” ماعندناش الحاجات دي” .

انت مش كده ..انت او انتي حاجه كده راقيه و محترفه في استعمال لغة الحب . ارمي مصريتك اللي بتلح عليك تقلب كل حاجه لسخريه او قلشه على جنب و انت هتلاقي حياتك فجأه كده نورت و بقيت زي الفل .
هاسيبك بقى و انا واثقه انك هتعرف تضبط اللي محتاج تضبيط : ” اشتري له هديه”.

*ملحوظه اولانيه : اللي هيقول لك ان محبوبك مادي عشان بيحب الهدايا .ما تردش عليه . سيبك منه ده جاهل.
*ملحوظه تانيه : اللي هيقول لك الهدايا دي حاجه مايعه كده و انت راجل مالكش في السهوكه خد فيه ثواب المره دي و رد عليه ..قل له “انت هتفهم اكتر من زين الرجال و ارجل راجل مشي على الارض – عليه الصلاة و السلام لما قال ” تهادوا تحابوا” ؟.. لو اصر يكمل قلش عليك ..سيبه ده ميت و بيمثل انه حي . كمل في طريقك و #اشتري_الهديه

عالمك الخاص