عقاب الاطفال من سن 3 : 7 سنوات

40

Get real time updates directly on you device, subscribe now.

ايه العقاب المناسب حسب سن طفلي ؟

من سن ٣ – ٧ سنوات:

– في السن ده .. عكس قبل كده .. الطفل بيبتدي يدرك حقيقة انه مش مركز الكون و يفهم ان مش كل حاجة مخلوقة او موجودة في الدنيا لتلبية رغباته و احتياجاته هو و بس ((راجعوا الجزئين اللي فاتوا)) .

– في السن ده الطفل هيبتدي يفهم ان لازم يتصرف في حدود معينة و حسب قوانين محدده تتطلب في كتير من الاحيان موافقة الآخرين ((الأبوين في الغالب))

– في السن ده الطفل هيفهم حاجة مهمة جدا جدا .. هتساعدنا و هنستخدمها كتير جدا في تقويم و ارشاد الطفل ..

هيفهم ان افعاله دائما ليها عواقب و نتائج (consequences) و ان الحاجة اللي هيعملها هتأثر عليه و على الغير بالسلب او الايجاب .. ((نحفظ النقطة دي كويس))

– في السن ده .. الطفل بيعمل حاجة بتقلق و تزعل كتير من الاهالي .. هيبتدوا يشتكو ان الطفل ابتدى يكدب ! ..

بس لازم نعرف ان مبدئيا كده اغلب الاطفال قبل سن ال ٥ سنين مش بيكونوا فاهمين قوي يعني ايه كدب لانه مش بيكون قادر يفرق بصورة واضحة بين الحقيقة و الخيال .. و امتى يقدر يستخدم مخيلته لتوصيل المعلومة و امتى لا ((هنتكلم ان شاء الله عن موضوع الكدب بالتفصيل في بوست لوحده))

– في السن ده .. الطفل بدأ يفهم الجمل المركبة و الطويلة و الازمنه و علاقة الاشياء ببعضها ..

– في السن ده .. مع ان الطفل ابتدى يفهم عواقب افعاله زي ما قولنا ،، بس في نفس الوقت هنلاقيه لسه بيحكم على الامور من منظوره هو ((اللي هو طبعا غير عقلاني و طفولي و غير منطقي بالنسبة لينا احنا الكبار))

ف بطبيعة الحال هتلاقي نفسك متضايقة و حاسة ان ابنك بيعاندك و قاصد يغلط عشان يغيظك .. لانك عارفة فعلا انه كبر و ابتدى يفهم الصح من الغلط بس في نفس الوقت بيكرر الغلط بصورة مستفزة ..

✋???? طيب اتصرف معاه ازاي ؟!

???????? اولا: هنستغل فهمه للعواقب و النتايج المترتبة على فعله .. و هنبتدي من السن ده نطبق مبدأ الثواب و العقاب ..عمل حاجة كويسة هنكافؤه .. عمل حاجة غلط هنعاقبه ..

بس هنخلي بالنا .. المكافئة و العقاب في السن ده لازم تبقى في وقت الفعل و متبقاش متأخره عشان الطفل يقدر يربطها بالفعل و تجيب نتيجة .. الطفل ميقدرش لسه يربط الموضوع ده على المدى الطويل .. ((يعني حاجة زي مثلا لو زاكرت كويس و طلعت الاول هعملك كذا مش هتجيب نتيجة غالبا مع السن ده)) .. المكافئة و العقاب يبقو بعد الفعل مباشرة و مرتبطين بيه

???????? ثانيا: هنكمل في طريقة العزل لانها لسه بتجيب نتيجة و مسموح بيها في المرحلة العمرية دي .. و حسب الشروط اللي قولناها في بوست العزل قبل كده

???????? ثالثا: مش هنستجيب ابدا لزن الطفل و ضغطه مهما حصل .. قرارنا لازم يبقى واحد و محدد و منستجبش لضغط الطفل علينا مهما حصل .. لو الطفل فهم ان الزن ((الفعل – Act)) هتكون نتيجته ان احنا هنستجيب ((العاقبة- consequence)) وربطهم ببعض هنقع في مشكلة كبيرة هتستمر لفترة من الزمن.

???????? رابعا: في المرحلة العمرية دي .. احنا اكتسبنا القدرة على شرح الخطأ بصورة مبسطة للطفل .. بعد ما كنا في المراحل السابقة بنكتفي بكلمة او كلمتين .. دلوقتي لا .. لازم نشرح للطفل ليه اللي عمله ده غلط .. و ليه احنا بنعاقبه .. و ايه الصح اللي كان المفروض يتعمل في الموقف ده .. الشرح دائما لازم يسبق العقاب

???????? خامسا: في السن ده .. لازم نزرع في الطفل ان الكدب ده حاجة مش مسموحة ابدا .. و انه لازم يعرف ان الاعتراف بالخطأ افضل كتير جدا من انه يكدب عشان يهرب من العقاب .. و لازم يعرف ان الكدب في حد ذاته خطأ كبير يستوجب عقاب اكبر من عقاب الخطأ اللي هو ارتكبه ..

بس هناخد الموضوع في الاول بالراحة لان زي ما قولنا الطفل مش بيكون فاهم قوي يعني ايه كدب لحد سن ال ٥ سنين .. بعد كده مش المفروض نتساهل ابدا في موضوع الكدب ده ..

Get real time updates directly on you device, subscribe now.

تعليق 1
  1. […] تابع قراءة الموضوع بالكامل من الرابط التالي : عقاب الاطفال من سن 3 : 7 سنوات […]

التعليقات متوقفه